港台爆渠遇選舉論壇 流動廁所應急

【明報專訊】港台電視大廈近日受「爆渠」困擾，2至3樓廁所停用，員工人有三急要走落地庫廁所，都幾唔方便，由於今日會舉行立法會選舉論壇，估計人流大增，港台噚日就出動流動廁所「救急」，但反應唔太理想。


有港台員工透露，4日前（周二）開始電視大廈2樓同3樓廁所大渠爆咗，維修工程到家未完成，只能用地庫廁所，但大廈只得一部升降機，上上落落有時要等成10分鐘，同事唯有忍得就忍，更加有身體唔太好嘅同事唔飲水兼忍尿太耐，搞到患尿道炎要睇醫生。


員工話，啱啱今日電視大廈會舉辦選舉論壇，擔心人太多唔夠廁所用，所以噚日中午開始大廈地下安裝咗流動廁所，但係似乎唔太受員工歡迎，因為流動廁所無得洗手，要喺外面放一個大水桶，亦有員工反映落雨要擔遮去廁所非常麻煩，所以盡量都唔去喎。


港台發言人就承認，周二開始電視大廈2樓同3樓廁所出現污水渠滲漏，正努力搶修，希望下周完成，因應今日舉辦地區直選選舉論壇，預料有好多助選團出席，所以安排咗幾個流動廁所。