田少平民裝拉票 侯強有超強義工

【明報專訊】早前有老闆級候選人落區宣傳時，被傳媒發現身穿價值2000元嘅白恤衫，被人覺得太「離地」；人稱「富貴黨」嘅自由黨，其榮譽主席田北俊噚日就喺facebook發揮一貫「抽水」本色，大sell自己全身「平民裝」價錢，指「『賴茄』Polo上衣﹕港幣300；灰色牛仔褲﹕港幣500；橡膠鞋﹕港幣400」，加埋不過1200元。田少好識做，話「選民嘅支持：無價!!!」，又自嘲「好擦鞋」。


發起網上攻勢嘅，仲有被網民封為「比卡超雄」嘅工黨張超雄。佢噚日上載咗一條別開生面嘅宣傳片，以搵人喺白紙上畫畫同寫字形式，介紹殘疾人士政綱，有趣又簡單，7個鐘已吸引到1.4萬瀏覽量。


婆婆義工一周貼百萬通函

此外，候選人都忙緊搞宣傳單張，事關要今個禮拜五前將郵件送抵郵局，先保證到選舉日前寄到入屋。自稱無龐大財政資源嘅上水鄉委會主席侯志強呢幾日都密密趕工，仲發動咗一班婆婆級義工幫手貼通函。佢哋戰鬥力真強，侯志強喺facebook透露，佢哋一個禮拜就搞掂97萬份郵件，即係平均一日要貼近14萬份咁多！


新界東其他候選人仲有方國珊、林卓廷、廖添誠、陳云根、梁國雄、楊岳橋、麥嘉晋、鄭家富、葛珮帆、李梓敬、鄧家彪、范國威、陳玉娥、黃琛喻、李偲嫣、陳志全、梁頌恆、梁金成、容海恩、陳克勤。