李慧琼對談 請曾鈺成食薯片

【明報專訊】民建聯主席李慧琼（Starry）噚日搵咗民建聯創黨主席、立法會主席曾鈺成喺該黨總部搞對談節目，唔知係咪想借曾主席最近嘅高人氣幫手谷票。一向辯才好好嘅主席，對住黨友無留情，講到官員問責制、「剪布」問題，有唔少爭辯。


修改「點人數」阻拉布不可行

對於建制派就曾主席唔夠強硬「剪布」有微言，又提出過修改「點人數」嘅議事規則，曾鈺成透露，曾經搵香港同英國資深律師問過意見，一致話無得傾，因為《基本法》內寫到明立法會大會要有一半議員出席。佢坦言，若要解決「拉布」，都係要靠議會大多數設立「剪布」機制。


曾主席：到咗食花生年紀

難得兩代主席對談，大家當然都講吓民記發展。曾鈺成贈言民建聯，期望新一任民建聯議員對參與議會辯論可以多啲興趣，有所表現。Starry噚日都貼心準備咗薯片同蝦條招待師父，唔知有無特首選舉嘅寓意呢？（財政司長曾俊華被稱為「薯片叔叔」）。不過曾主席就嫌太熱氣，唔多想食，又自嘲話已「到咗食花生嘅年紀」。但佢最終頂唔住Starry盛情邀請食咗，笑言「民建聯畀咩我咪食咩囉！」


立法會候選人名單見附圖。