家有「實驗兔」 黃友嘉﹕佢識安慰人

【明報專訊】強積金管理局主席黃友嘉（右三）噚日出席寵物活動，佢同Emily透露屋企養咗隻白兔仔叫「Pillow」，當正兔仔係家人。黃友嘉話「Pillow」原本係實驗室嘅實驗樣本，為免畀人做完實驗後人道毁滅，所以佢個女喺美國帶「Pillow」返嚟，喺屋企養咗約5年。黃大讚「Pillow」好識冧人，會喺佢唔開心時，主動黐埋黃友嘉腳邊安慰佢。


講番個寵物活動，係由海港青年商會主辦嘅「狗狗也行醫」問卷調查發布會暨嘉年華，藝人林保怡（右二）都有帶埋佢隻雪橇犬「阿水」出席。調查喺6月20日至7月19日期間以網上問卷訪問咗986人，結果顯示，受訪者普遍認為同寵物相處時嘅滿足感，比起人同人相處嘅滿足度更高。有養寵物嘅人，無論心理、健康同人際關係方面，亦較冇養嘅人正面，但當中點互為影響，仲有待進一步研究。