書中沒有黃金屋？ 誠品五大暢銷品書籍僅佔一 珍珠奶茶排第二

【明報專訊】龍應台《大江大海1949》居榜首

銅鑼灣誠品書店今個月10號就開業4周年，噚日首度公布港人最愛五大商品，第1位係龍應台嘅《大江大海1949》，4年間賣出超過5000本，據講長期佔據誠品暢銷榜。至於所有書籍夾埋就賣出300萬本，即係平均每日賣超過2000本。


歎茶打書釘 日賣6000杯

不過，五大最愛商品中，有4項產品都唔係書，第2位嘅天仁茗茶跟住誠品過江，原來已賣出218萬杯，即係平均每日賣近6000杯，相當驚人，其中最受歡迎嘅係珍珠鮮奶茶，唔少客人都鍾意拎住杯奶茶邊飲邊睇書。第3位亦係黑馬，mt紙膠帶累積賣咗20萬卷。其餘兩位就係LAMY鋼筆，同支持台灣在地小農嘅奇芋大地芋頭條。


誠品本身係一間書店，咁點解五大商品只得一本係書咁奇怪？誠品公關解釋，唔係只睇銷售數字，而係盡量推介唔同種類嘅商品。另外，誠品銅鑼灣店嚟緊10至14號會舉行4周年慶，頭炮係10號當日消費滿300蚊即減50蚊。