曾鈺成談抉擇 指心理障礙阻求變

【明報專訊】立法會主席曾鈺成嘅專欄經常話中有話，噚日佢就用一條問題，講吓「心理障礙」點樣妨礙人「要變」嘅判斷。特首梁振英上次選舉都係打要「穩中求變」，曾主席咁寫，唔通暗示下年特首選舉應該要再變？


抽獎為例 改變選擇更有利

曾主席喺《am730》嘅專欄度拋出一條問題，話有電視台推出有獎遊戲，喺參加者面前擺3道閂咗嘅門，其中一道門後有名車、其餘兩道門後就各有一隻山羊，供參加者揀獎品，當參加者打開選擇嘅門之前，就會有第二個選擇機會，主持將打開其中一道後有山羊嘅門，參加者可以揀改變初衷或維持原本選擇。


曾主席話，相信絕大多數人都認為改變選擇唔會提高贏名車機會，但健力士世界紀錄IQ最高嘅人就話，應該改變選擇；因維持選擇而贏得名車嘅機會係三分之一；但改變選擇，贏車嘅機會就增加到三分之二。


指高估現存事物致不想變

曾主席話，有分析認為，作出錯誤判斷係心理問題而唔係邏輯問題，有專家就指出3種心理現象妨礙人做出「要變」嘅正確決定：一係「稟賦效應」，即過高估計已存在事物嘅價值；二係「現狀偏差」，即情緒上傾向維持現狀；最後係「多一事不如少一事」，寧願做少應做嘅事，而怕做多咗唔應做嘅事。