5體育館設觀賞站 播奧運精華

【明報專訊】巴西里約奧運星期六開波，康文署會喺5個體育館設「活力奧運觀賞站」，畀市民重溫奧運賽事嘅精華片段，又會舉辦同體育相關嘅趣味活動，市民可以感受吓體壇盛事。


5個觀賞站分別係九龍公園體育館、柴灣體育館、士美非路體育館、香港單車館同屏山天水圍體育館，除咗有大型電視屏幕播奧運精華片段之外，仲有好多體育文娛表演、運動主題嘅攤位遊戲、奧運相關展覽同埋今年奧運金牌榜等等。由今個星期六到8月21號，呢啲場館都會開放，每日免費入場，先到先得。開放時間由上午8點至晚上11點。


另外，由明星組成嘅星級打氣團都會出動，8月6號有吳若希、鄭俊弘喺九龍公園體育館；8月14號「坤哥」吳業坤會喺士美非路體育館，同觀眾玩遊戲、分享運動知識，活動當日9點起免費派飛。仲有其他「星星」，讀者可以瀏覽康文署網頁（www.lcsd.gov.hk/tc/ofs/index.html）。