朱凱廸搞「不是素人」宴籌經費

【明報專訊】今屆立法會有唔少玩咗社運一排、但未有從政經驗嘅人參選，就好似劉小麗（小麗老師）、朱凱廸咁，佢哋冇大政黨背景，又冇財團力撐，面對龐大選舉開支，唯有向公眾募捐。


立法會地區選舉嘅最大參選成本，相信係入屋嘅選舉單張，雖然首份免郵費，但係一份嘅印刷成本成1蚊，小數怕長計，派晒畀所屬區域嘅選民，郁吓都幾十萬㗎。參選九龍西嘅小麗民主教室劉小麗日前喺facebook呼籲，希望喺一星期內籌夠30萬，用嚟畀文宣印刷費，叫每人捐999蚊畀佢，目前已有約150人捐咗畀佢，換言之幾日內已籌到15萬元，加上喺六四同七一街站籌到28萬，兩個月籌到43萬。佢話如果未籌夠所需金額，就會「告急」，若都係唔夠，就會自己拎出嚟，但都希望市民多多支持。


另一叫人捐款嘅仲有參選新界西嘅土地正義聯盟朱凱廸，佢就勁喇，由上月17號至今已經籌到53萬，家需要籌多35萬，主要都係畀印刷費，因為新界西係全港最大選區，預料要印60幾萬份。除咗希望隔空過數捐錢，佢又邀請市民今個星期六去新界農莊同佢面對面食飯交流，傾吓對城鄉、社區、教育同環保睇法，順便籌募經費，但呢餐「不是素人」宴收費每位盛惠800蚊。