私隱署提醒起底或犯私隱例

【明報專訊】選舉臨近，近日有網民將否決本土派參選資格嘅選舉主任「起底」。私隱專員黃繼兒噚晚專登出稿提醒大家，咪以為針對個別人士（包括公職人員）發起個人資料「起底」，並出言恐嚇會無事，指呢啲網絡欺凌有可能獨犯私隱條例。


社會上可能有誤解，以為從公共領域直接收集嘅個人資料，可無限制使用。黃繼兒話，香港未有專門規管網絡欺凌嘅法例，而網絡欺凌活動涉及嘅範疇廣闊，包括誹謗、刑事恐嚇及侵犯知識產權等，各個執法部門需共同參與，從而援引不同法例以規管有關活動。不過，佢話就個人資料私隱而言，根據《個人資料（私隱）條例》下嘅「保障資料原則」，要判斷某啲行為有無觸犯私隱條例，就要視乎個人資料係咪透過合法及公平嘅方法收集；係咪有通知當事人收集資料嘅目的等。如果隨便將公共登記冊、搜尋器及公共名冊之類喺公共領域取得嘅個人資料，用於起底或網絡欺凌，就有可能違反保障資料第3原則。


若違反保障資料原則，私隱專員可發出執行通知，指令資料使用者採取補救措施，以免觸犯條例嘅規定。唔遵守執行通知即屬犯罪，違法者一經定罪，最高可被判罰款5萬元及監禁2年。如罪行持續，可處每日罰款1000元。