有話說﹕全日制到咗今日係咩玩法

【明報專訊】作為兩個細路嘅媽咪，Mama同好多父母一樣，都好關心香港嘅教育政策，尤其係「真．全日制」小學呢個課題，日望夜望教育局一班高官，可以認真檢視一下佢哋當年推行嘅「德政」，家究竟有幾多學校係實行緊。


或者一眾高官忙於搞TSA、普教中，唔得閒蒐集資料啦，所以一直無理會家長嘅訴求。唔緊要，由一班家長自發成立嘅「香港革新教育家長同盟」（下稱同盟）就出錢出力代勞。今年4至5月期間，同盟喺網上搞咗個「全日制小學學習生活情况調查」，總共收集到518份來自116間小學家長嘅問卷回覆，有關數據，已經喺上星期五同盟專頁以Facebook Live形式發布。


每日100分鐘休息 僅1間達標

Mama一路睇直播，都忍唔住嘆氣。原來家香港所謂嘅全日制小學，絕大部分都係「假」全日制，完全走晒樣。錯過咗當日Facebook Live發布會嘅家長唔使失望，可以喺同盟專頁及YouTube重溫，但Mama都想喺呢度總結幾項重點。


首先，教育局曾經建議全日制小學，應該每日畀學生有100分鐘休息時間，但根據呢116間小學嘅數據，只有1間遵照教育局嘅建議，其他都係打個7至8折，即小朋友全日只得70至80分鐘休息，理想與現實落差都幾大。


另一個重點係導修課，教育局當年提出推行全日制小學時，其實建議過學校應讓學生喺校內完成大部分功課。但調查就發現，喺呢116間小學裏面，有近三成學校係完全無導修課，而每日有導修課嘅學校，就只佔15%。講真，如果教育局有心監管，只要睇下學校嘅上課時間表，「真」或「假」全日制，就已經無所遁形啦！


最令Mama扯火嘅，就係家課政策。好多家長都唔知道，學校有責任制定及公開家課政策畀家長知道。大家唔好誤會，咪以為學校內聯網公布今日有乜功課就叫家課政策。No！家課政策係關乎家課質與量嘅問題。質係指呢間學校要求學生做嘅功課，大概係乜類型；量就係指學生要花幾耐做功課。假設A校喺家課政策講明要做兩個鐘，B校就講明只做30分鐘，正所謂鹹魚青菜，各有所好，至少畀家長了解咗先去揀讀邊間。


講到做功課時間，好多校長都推搪要視乎小朋友係咪專心做，專心就自然做得快，唔專心就會做耐些少。不過，同盟召集人Eiffel話咁講好唔負責任，校方從來唔公布家課政策，家長根本判斷唔到，仔女日日做幾個鐘頭功課，係自己做得慢，抑或真係功課量太多。假如學校大方公布家課政策，講明初小功課量約做半個鐘，高小約做一個鐘，而大部分同學仔又的確係花相若時間完成，只係得自己嗰個搞唔掂的話，咁就梗係唔能夠怨天尤人；反之，根本大部分同學都遠遠達唔到學校公布嘅完成時間，咁就證明學校講大話，家長咪可以同校方協商下功課量係咪過多囉，所以呢點相當重要。