檔主吐苦水 葉劉街市擔水

【明報專訊】炎炎夏日30幾度行出街已經好辛苦，新民黨主席葉劉淑儀就去咗領展轄下嘅鴨脷洲邨街市擔水。葉太話，有檔主投訴街市今年初開始唔再借水喉畀佢哋洗地，搞到檔主要親自擔水返檔口洗地用。葉太睇唔過眼商販咁慘，已經同領展行政總裁王國龍投訴，王回覆話會立即跟進。


領展街市被指拒借水

已報名競逐連任立法會港島區議席嘅葉太喺facebook話，噚日去鴨脷洲見街坊時，街市檔主投訴要自己擔水洗地，每日仲要擔幾次。葉太隨即親自試擔一下，都話挑兩桶水真係幾重。


除咗水喉問題，商販都有吐苦水話鄰近屋邨冷氣機排出嘅污氣影響街市環境。商販指租金連年加幾千元，現時一個肉檔租金要兩萬蚊；菜檔都要7000，但管理質素每况愈下。


葉太話對以上情况睇唔過眼，所以即刻聯絡王國龍，話領展唔可以因為商場未翻新，租金回報率低就唔理租戶。王國龍都話唔應該有呢種事發生，仲承諾會立即跟進改善情况。


港島區其他已報名名單包括：鄭錦滿、許智峯、郭偉强、張國鈞、羅冠聰、司馬文、王維基、陳淑莊、沈志超、黃梓謙、劉嘉鴻、何秀蘭、詹培忠同徐子見。