再答選特首否 曾鈺成：等吓先 孫公：似乎等待欽點

【明報專訊】除咗立法會選舉，相信唔少人都好關注明年特首選舉，被認為係「四號仔」（除咗梁振英、林鄭月娥同曾俊華外）嘅立法會主席曾鈺成，噚日再被問到會否參選特首，佢繼續唔正面回應，只話「標準答案係『等吓先』」。


主席：要有自知之明

曾主席話，係咪參選除要考慮「社會係咪需要你」、使命感、責任感外，好重要係有自知之明，唔可以強出頭，有啲事做得到就做，做唔到嘅話都唔會有好結果。


曾鈺成近日答得模稜兩可，教育局前局長孫明揚就話曾主席態度十分曖昧，似乎喺度等待欽點。孫公噚日喺《AM730》嘅專欄，論盡特首疑似參選人，佢話比對第一屆同上屆特首選舉，可睇到中央對特首人選，由最初只着重係咪德高望重，變成仲需要有能力。


孫公話，講到能力，大家成日吹捧政務司長林鄭月娥，話佢有意參選，佢話自己曾與林鄭共事，覺得佢當政務司長一流，係最有能力同最合適人選，但唔相信佢有志做特首。至於另一舊同事曾俊華，佢形容對方才華有目共睹，唔知佢係咪想做特首，但就知唔少人希望捧佢出嚟，同「ABC」（anyone but CY）對着幹。


至於最想選嘅，孫公話特首梁振英唔使多講，仲有兩個有志者，一個係新民黨主席葉劉淑儀，但要先選立法會，如有咩閃失就尷尬，所以至今仍有所顧忌；另一個係前財爺梁錦松，孫公形容對方最近積極增加曝光率，必有所圖。