海洋公園App 預覽等遊戲時間

【明報專訊】暑假去主題公園玩，大家都怕要排隊。Emily聽到海洋公園自行研發咗個系統，遊客到咗樂園，只需打開海洋公園嘅手機App（圖），聯上Wi-Fi，就可睇到不同遊戲同表演嘅輪候時間，希望大家都可以識得走位排隊，令輪候時間控制喺30分鐘內。


海洋公園營運總監吳守堅講起，最常見係大批遊客一齊睇完表演，等坐纜車落山，輪候時間自然長，樂園App新功能係向遊客發布佢哋所處位置附近人流較少嘅遊戲，客人見排隊落山等咁耐，可先去附近玩吓遊戲，避開輪候高峰期。


輪候時間嘅計算方法係由海洋公園自行研發嘅「Pflow」應用程式計算，呢個App仲獲得「GSMA亞洲移動大獎」嘅獎項。