李國章救紅衫 宣傳可持續生物資源

【明報專訊】可持續發展委員會噚日發表有關「推廣可持續使用生物資源」公眾參與文件，展開3個月嘅公眾收集活動，委員會希望透過呢項活動，加深公眾認識生物資源嘅重要，推動可持續消費習慣，活動截止日期為11月15日。


李國章自去年3月出任委員會主席後，首次以主席身分召開記者會，佢話市民日常生活中依賴各種生物資源，其實好多生物正面臨滅絕，所以委員會認為推廣可持續使用生物資源刻不容緩，決定就此議題開展公眾參與活動。


香港人不時被指過度消費，委員會支援小組召集人黃煥忠都話港人明顯唔環保，消耗量大過生產量，好似以往成日食嘅紅衫魚，整體數量過去10年大跌30%，如果唔減少消耗，甚至可能絕種。


黃煥忠話明白現時綠色產品市場好細，但市民改變習慣係可以帶動消費市場轉變，好似法國經長時間教育，就算環保或有機產品較貴，大家都會買，有需求自然有商家配合。佢又話呢項活動踏出第一步，等委員會了解市民諗法，再寫成報告提交政府。