范太愛自由 志願揸貨櫃車 鍾意令狐沖看淡名利

【明報專訊】今年書展主題係「武俠文學」，原來全國人大常委范徐麗泰都係「武俠迷」。大家又估唔估到，從政多年嘅范太，原來細個嘅意願，係想做貨櫃車司機或球員呢？


范太噚日同一班年輕人行書展，去到特設嘅武俠小說展區，勾起佢唔少回憶。范太話，以前試過為咗一氣呵成睇小說，搞到連覺都唔瞓。佢覺得武俠小說內嘅人物都好有個性，最鍾意嘅角色係金庸小說《笑傲江湖》嘅令狐沖，因為佢無拘無束，看輕名與利。


不過佢就笑言「我無佢咁瀟灑」，又話自己從政只係偶然，細個志願係做貨櫃車司機，因為揸車可以享受一個人嘅自由，想做咩都得。


除咗經典文學，范太話咩書都會睇，包括科幻同愛情小說。時下年輕人鍾意睇網絡小說，范太都話要慢慢挖掘新世界，仲叫同行年輕人介紹啲書畀自己。


獲推介「恐懼鳥」 「孔子個孔？」

有女同學推薦最近成為話題嘅網絡小說作家「恐懼鳥」嘅書，不過范太好似無聽過，仲問作者係咪姓孔子嘅「孔」。「恐懼鳥」啲書早前喺家長圈引來極大爭議，其中《Deep Web File #網絡奇談》就被指涉及殺人同烹煮人肉情節，被列為第二類不雅物品，禁向未滿18歲人士發售。