有話說﹕Pokemon Go殺到 家長點算好

【明報專訊】講到近排至hit玩意，肯定係Pokemon Go，玩家拎住手機，跟住GPS，不惜走遍大街小巷，都要捕捉到小精靈。呢個遊戲用咗擴增實境技術，小精靈識郁識叫，都幾逼真㗎，難怪大家咁想捉到佢哋啦！


變誘拐兒童新招？

不過，呢個遊戲都導致咗唔少意外，美國同澳洲都有人太專心捉小精靈，行路唔帶眼，結果跌倒受傷；亦有人走入醫院搵比卡超，阻住病人休息。而Mama最關注嘅，當然係小朋友嘅安全問題啦！外國有網民街頭實驗，向小朋友搭訕，話公園暗角位置有一隻罕見小精靈，有兩個小朋友真係毫無防備，直接跟咗佢走呀。


睇完呢段片，Mama都嚇咗一跳，嗱嗱聲請教循道衛理楊震社會服務處兒童及家庭服務隊隊長陳秀雯，點樣先可以避免仔女玩得太忘形，樂極生悲？佢都認為呢個遊戲特別易沉迷，因為平日打機，通常有一個終極目標，「爆機」就會停手；但Pokemon Go嘅玩家，搵完一隻精靈，行行下又收到另一個提示，「永遠都同你講附近有小精靈，可能就喺你左邊幾步，或者眼前幢大廈後面」，一知道有精靈，玩家就心郁郁想搵，要收手都唔係咁易。


家長一齊玩 寓教於打機

不過，佢叫家長唔使太緊張，或者禁止囝女玩Pokemon Go，最重要係約法三章。首先係時間限制，唔畀佢哋玩太耐；其次，小朋友離開屋企，要先向家長交代行蹤，包括去邊度、去幾耐同點解要出街；最後，如果陌生人邀請去捉精靈，一定要拒絕，除咗避免被誘拐，亦建立警覺性，「唔單止Pokemon Go，家有咁多網上遊戲、交友平台，佢哋會唔會同人傾兩句，就以為係熟人呢？家長可以趁呢次機會，灌輸安全意識」。


如果家長仲係唔放心，不妨同小朋友一齊玩。陳秀雯識得唔少家長，平日會陪囝女打機，一來判斷遊戲內容係咪適合，二來建立親子共同興趣和話題，過程中仲可以塑造性格，「例如見到小朋友好怕輸，家長就鼓勵佢哋再接再厲，希望下一鋪贏番」。