誓師大會疑中暑見暈 偲嫣認新書有執相刪雀斑

【明報專訊】表態撐CY連任

正義聯盟黨主席李偲嫣噚日喺大埔頭水圍村公園舉行誓師大會，表明將會參選下屆立法會新界東直選，仲表態支持梁振英連任，提出同近日Anyone but CY （任何人都得，除咗梁振英）相反嘅No one but CY（只要梁振英）論調。噚日烈日當空，大埔最高溫度達到32℃，李偲嫣叫完口號影相時，忽然身體不適暈倒，黨友立即幫佢撥扇塗藥油，再扶佢休息。事後佢聲稱，因為「慳錢」，捱咗十幾晚為書展新書校對，搞到無晒精神，結果炎炎夏日下疑似中暑。


稱《情書》已售數千 擬大陸發行

噚日誓師大會原本12點開始，但李偲嫣遲足半個鐘先趕到，佢聲稱係的士司機唔識路，搞到遲咗，仲同在場記者道歉。問到今年書展佢本《情書》嘅銷情，佢話已經賣出幾千本，當中超過1400本係公司嘅內部促銷，仲計劃8月中發行到大陸、台灣同星馬地區，希望總共可獲得6位數字收入，賺得嘅一分一毫將全數用作參選立法會嘅經費喎。佢仲話前日見到咁多年輕朋友到書展支持佢，好想再落場一次刺激銷量。


對於有人質疑佢本新書嘅修圖技術出神入化，相片同真人個樣有出入，有人質疑佢有違反《商品說明條例》之嫌，李偲嫣就話只係角度問題，但承認有「小量」執相，例如執走咗啲雀斑，但近睇仲望到佢啲乾紋同毛孔，而且其他出書嘅人都會執相㗎啦。


目前新東已有14張名單報咗名，而李偲嫣就話計劃本周先報名。