麥美娟大暑報名 長者曬住撐場

【明報專訊】噚日大暑，好多地區最高氣溫都超過30度，不過仍然無損一眾立法會參選人造勢嘅決心。工聯會麥美娟（Alice）噚日報名參選競逐連任新界西，近百個以老人家為主嘅支持者吶喊助威，造勢現場部分地方有上蓋，但工作人員就叫支持者唔好企喺「陰影位」，話會阻到途人，結果一班公公婆婆企喺猛烈陽光下面企後排站台，搞到大汗疊細汗，部分要撥住紙扇降溫。


Alice就慰勞支持者，話佢哋用汗水打拼，汗水係唔會白流，而立法會選舉在即，大家都會辛苦，所以希望大家注意身體。已報名參選超級區議會嘅黨友王國興亦現身，佢話大暑報名係好日子，但大暑嘅熱，熱唔過佢哋熱愛香港嘅心。


其實工作人員噚日都提供樽裝水畀支持者解渴。有9個議席嘅新界西已經有13張名單報名參選。