鄉局閉門會 鄉紳鬧何君堯「無資格嚟拜票」

【明報專訊】屯門鄉委會前主席、律師會前會長何君堯早前獲政府委任為「新界太平紳士」後，前日重返鄉議局首次開會，並向鄉事爭取支持自己出選新界西，不過因為曾與「新界王」劉皇發有過唔少過節，當日村民就唔多友善招呼佢。Emily噚日取得流出嘅多條閉門會議片段，發現何君堯被鄉事鬧得幾慘烈。


其中元朗廈村鄉委會主席鄧勵東發言時多次直斥何君堯「無資格」嚟拜票，更重提當年何擔任屯門鄉委會主席，「第一個帶人嚟拆祠堂」。另一片段就拍到屯門鄉委會副主席曾展雄話，2012年鄉議局鼓勵村民自願登記僭建物，惟何當時卻叫大家唔好登記，話登記等同認罪，搞到家啲鄉民下場慘淡，「佢哋一係被人告，一係被人拆，得兩個結果」。曾展雄直指何當日嘅誤導連累咗好多村民。


鬧足咁耐，何君堯都無乜點駁嘴。Emily就聽聞，何當時回應，同在場鄉事人員都係「一家人」，希望大家向前看，又話政治上無永遠嘅敵人，自己亦並非「完人」。


何君堯已報名參選新界西，目前有10隊名單報咗名。