海報入街市 傍住價錢牌 張國鈞自嘲「單買6蚊斤」

【明報專訊】立法會選舉進入提名期，除咗公共交通工具嘅車身廣告，參選人嘅宣傳品已經無處不在，其中報咗名參選港島區嘅民建聯副主席張國鈞，同參選「超級區議會」界別嘅主席李慧琼，就已有共同宣傳海報，仲貼埋入街市，但由於海報位置之下就係擺賣番茄、薯仔嘅地方，張國鈞就喺facebook乘機宣傳兼自嘲，「單買6蚊斤，雙併8蚊斤。手快有手慢冇！埋黎睇埋黎揀喇喂」，唔知可唔可以同菜檔起互相宣傳嘅作用呢？


而為張國鈞抬轎嘅立法會議員鍾樹根，接受報章訪問時就話，要向李慧琼推薦《世界雖然殘酷，我們還是……：生命最痛的省思，最美的領悟》呢本書，話自己認同書中唔少描述，認為有時挫折係好事，但亦祝福李慧琼遇到愈少挫折愈好。李慧琼噚日就喺fb回應話，諗住約埋樹根過幾日去書展，一齊讀書。