蔡子新書講餐桌政治 台灣出版

【明報專訊】書展將至，中大政治與行政學系高級講師蔡子強（蔡子）有新著作，今次主題係玩餐桌文化！蔡子唔係改行寫食評，而係描述30多個著名政治人物嘅餐桌政治，以及佢哋嘅飲食習慣，涉及嘅由拿破崙到奧巴馬都有。Emily睇過書目人物名單，無包括中國領導人，所以內容應該無泄露國家機密嘅風險。


新書名為《大人們的餐桌》，講述歷史風雲人物不為人知嘅飲食軼事，包括羅斯福、斯大林、李光耀、昂山素姬等，從餐桌探看政局。好似書中提到二戰前1939年英王喬治六世到訪美國，想拉攏美國結盟，但時任總統羅斯福竟然為英王搞露天野餐，食熱狗飲啤酒，惹起待慢客人嘅爭議，但其實羅斯福嘅「熱狗外交」，拉近英王同美國民眾嘅距離，咁美國去支援英國都較易爭取美國民眾支持喇。


書由台灣時報出版社出版，蔡子話佢喺台灣基本上係零知名度，對方肯幫佢出書實在難得，亦代表對佢寫作嘅肯定，而書本正喺台灣嘅書局發售。蔡子話，下周一（25日）下午2時半，佢會喺會展S426-427會議室出席書展嘅新書推介會，同讀者交流飲食與政治。