情願唔做論壇 飛哥挺自由黨反CY

【明報專訊】正所謂「輸人不輸陣」，唔同政黨噚日報名參選立法會都拉大隊為自己打氣。自由黨噚日到新界東報名參選立法會，就搵咗一班元老「大曬冷」幫手造勢，其中76歲嘅自由黨創黨主席李鵬飛都有現身撐場。飛哥話，撐自由黨當然係義不容辭，又大讚田北俊（田少）過去4年嘅議會工作有目共睹。


不過飛哥透露，其實自己撐自由黨都「有包袱」，有電視台邀請佢做今屆立法會選舉論壇主持人，但佢對特首梁振英（CY）感到好憤怒，認為對方只為個人利益，唔係為香港，所以情願唔做節目，都要出嚟力挺自由黨倒梁。


張超雄報名 有手語義工翻譯

經常為基層發聲嘅工黨張超雄噚日亦同場報名，支持者中除咗有殘障人士、地區戰友，仲安排咗手語義工幫手即場翻譯。


張超雄又話，曾用假身分證虛報年齡做保安而被判囚嘅施先生知道佢參選，噚日都現身支持，但就唔願意上鏡，只企喺人群之中。