有話說﹕廣東話優點多籮籮

【明報專訊】早排Mama追開一個真人騷，見到藝人孭起書包返學，都幾盞鬼㗎。不過有一集，小學校長解釋校規嗰陣，就同個藝人講，喺學校一定要講英文或普通話，連小息都唔例外。段片一放上網，即刻惹嚟網民批評。


Mama都好疑惑，小朋友冇機會喺學校講廣東話，廣東話咪會退步囉？咁都好可惜喎，有啲詞語用廣東話表達，係零舍傳神㗎！旅港開平商會中學中文科老師鍾靜怡都同意Mama嘅講法，佢以「水」字為例，喺廣東話特別多意思，除咗代表水本身之外，仲代表金錢，咁就可以向學生解釋，點解賺錢會叫「豬籠入水」啦；另外又可以解做提示，所以有「通水」丶「提水」呢啲詞語出現。因為一字多義，溝通起上嚟都生動啲。


廣東話亦反映到香港特色，就係中英文化並存。好多常用名詞都係英文翻譯過嚟。例如「的士」係Taxi嘅譯音，只要一講起「的士」，一方面會諗起個英文字，另一方面又諗起架車，如果講「計程車」就冇呢個效果喇。


從學習角度出發，廣東話對學詩詞歌賦都有幫助。廣東話有九聲，朗讀起嚟有明顯嘅抑揚頓挫，可以突出感情，增加對該首詩詞嘅體會，而且更易押韻。例如中學生必讀嘅《山居秋暝》，韻腳係秋丶流丶舟丶留，用廣東話讀先會全部押韻。


就算現代文學或者篇章，鍾老師有時都會按題材，用廣東歌詞輔助教學。教朱自清嘅《背影》時，佢喺班上播陳奕迅嘅《單車》，兩者都係講父親，而且坐喺單車後座，一樣係望住爸爸背影。至於有家長擔心學生用口語入文，鍾老師話，暫時問題唔算嚴重，而且唔止廣東話會出現呢個情况，其他語言都有區分口語同書面語。最重要係老師引導佢哋，學番正確寫法，「有學生平時聽人講『炒魷魚』，就直接用喺作文，我會喺隔籬寫番『解僱』，甚至叫佢作一句句子，佢誤用完一次，之後就學識書面寫法」。