傑志大炒觀塘區議員5：1

【明報專訊】球壇盛事歐洲國家盃掀起球迷熱議，而原來足球風吹到去區議會。觀塘區議員近期都組成球隊，仲秘密練兵，噚日越級挑戰港超聯勁旅傑志。觀塘人口雖然多過冰島，但可能佢哋唔識跳維京舞，唔能夠爆冷，結果喺呢場波區議員輸1:5。


觀塘隊由唔同黨派議員組成，成員包括主席陳振彬等，佢哋出賽前雖然有晒隊形、球衣裝備整齊，但畢竟平均年齡偏大且業餘，所以比賽都係友誼第一。球員之一嘅民建聯顏汶羽就話，佢哋呢隊雜牌軍踢得好認真，其中守龍嘅陳耀雄仲勇戰手腕受傷，賽後要去睇醫生。


輸波係意料中事，但兩隊球員打成一片，顏汶羽話最開心嘅係可以同擔任傑志學院教練嘅前香港足球先生高尼路同場較勁，仲話自己以前入大球場睇波，都有捧高尼路場。