響應全城愛蝶日 陳智思畫黑白蝴蝶露兩手

【明報專訊】環保團體綠色力量7月14日（周四）續辦「全城愛蝶日」活動，今年搞搞新意思，聯同本地木雕藝術家王天仁，以「廢木、升級再造；蝴蝶、蛻變美麗」概念，將廢木升級再造成蟲蟲和蝴蝶藝術品，仲搵咗蝴蝶大使、行政會議成員陳智思同副環境局長陸恭蕙等人參與創作。


木雕藝術家創作木蝴蝶

藝術創作對大學修讀藝術嘅陳智思來講無難度，佢用擅長嘅點畫手法，以黑白兩色「點出」自己嘅木蝴蝶。佢話估計其他大使製作嘅木蝴蝶都會五顏六色，所以佢刻意用咗黑白色構圖，咁自己嘅創作自然容易突圍而出！陳智思鍾意行山，佢話蝴蝶好常見，而正正因為佢哋太普遍， 很多時被人忽略咗，其實蝴蝶喺生態上嘅重要性比外表更吸引，如果有一日無晒蝴蝶，將會係生態大災難。


陸恭蕙都唔輸蝕，佢話希望大家可以多角度欣賞佢嘅作品，所以喺蝴蝶翅膀底面都塗上咗美麗嘅顏色，等人睇起嚟好似拍翼起舞。綠色力量推廣蝴蝶保育，邀請各界人士參與木蝴蝶創作，並會於8月中開始陸續於不同地點展出作品。