魔童時薪$32.5請選舉助理 要求大專生 「請開暑期工呢個價」

【明報專訊】社民連主席吳文遠噚日喺facebook上載一張截圖，話已經表明參選立法會港島區選舉嘅王維基（圖），最近向大專生招手做選舉助理，但係出手好低，時薪32.5蚊，即係僅僅符合最低工資，但應徵者既要有或修讀緊大學或大專學位，又要有良好中英文講寫能力、電腦軟件應用知識等，而呢份工要協助籌備選舉，有需要喺戶外工作。


吳文遠：都唔夠去HKTV Mall買嘢

吳文遠話，社民連雖然窮，但有時見學生義工無錢使，都會畀啲合理車馬費，時薪都有50蚊啦，揶揄話幫王維基助選，「真係做埋都唔夠錢去HKTV Mall買嘢」。


王維基就同Emily解釋，呢份係暑期工，只請幾個人，對於部分麥當勞員工時薪都高過最低工資，王維基話：「我唔知呀！我哋請開summer job都係呢個價，好多時出面請summer job都係呢個價，只係學生，未畢業喎，做些好簡單工作。」


王：只係未畢業學生做簡單工作

王維基話，招聘嘅暑期選舉助理會負責行政同社交媒體工作，「好多濕濕碎碎工作」，噚日開始推出招聘，今日都有啲學生查詢。