《黃金戰士》贈怪醫 醫界盼「解危機」

【明報專訊】被形容係「怪醫」嘅醫學界立法會議員梁家騮，近日為咗捍衛業界利益，喺立法會審議《2016年醫生註冊（修訂）條例草案》時，不停點人數拉布，醫學界組織「杏林覺醒」就喺facebook貼上「騮哥撐你」嘅大字報，仲送上經典卡通《黃金戰士》主題曲嘅歌詞支持怪醫，希望怪醫可以好似黃金戰士咁「高飛吧！高飛吧！解開危機」。


噚日朝早建制派議員未使出「坐定定」嘅絕招時，怪醫喺立法會點人數絕無手軟，平均一個鐘點3次。Emily聽聞，怪醫有一個計時器，一夠鐘就會點人數，但怪醫只笑笑口話係「秘密」，唔肯證實呢個傳聞。


怪醫之前做訪問時，曾笑言因為要養家，每個月生活開支要20萬。呢幾日喺立會拉布，咁咪睇少好多症？怪醫笑言唔係有太多症要睇，仲話已預留時間繼續開會。