出席居民大會 林卓廷有反黑傍住

【明報專訊】民主黨總幹事林卓廷因為搞反圍標、搞禍唔少天價維修工程，相信得罪咗唔少人，阿廷話最近喺地區都收到好多抹黑傳單，有時出席居民大會時，亦見到有疑似黑道背景嘅人出席，並用粗口指罵佢。阿廷話已知會警方一聲，所以近日出席居民大會都見有反黑組現身，區議員做到出席活動有反黑陪同，都算罕有。


噚日民主黨主席劉慧卿同阿廷一齊同傳媒茶敘，積極考慮參加新界東立法會選舉嘅阿廷話，卿姐好大機會排喺名單第二，話今年選情都嚴峻，卿姐若排第二，可以起好大作用，皆因卿姐有唔少支持者。阿廷同時希望可以開拓一啲支持反圍標、反貪腐嘅新票源。


卿姐就話，最近收到唔少在囚者嘅來信，希望佢可以繼續參選。卿姐寄語有機會接棒嘅阿廷，未來一定要繼續關注在囚者、外籍家庭傭工同僱主嘅權益問題。