民建聯出書 中聯辦官員撐場

【明報專訊】臨到立法會選舉，唔同政黨都趕住出新書宣傳。民建聯噚日就舉行新書發布會，將去年舉行嘅3場圓桌會議內容結集成《百川匯》，邀請特首梁振英寫序。雖然書嘅封面係民建聯團隊大曬冷，其實裏面總共有45個唔同背景嘅嘉賓討論經濟、傳統產業同埋民生困局等範疇，仲有標榜中間路線嘅新思維主席狄志遠、民主思路召集人湯家驊。


評新思維 中聯部長﹕好細

中聯辦社工部長楊茂、署理商務及經濟發展局長梁敬國噚日做新書發布嘅主禮嘉賓。雖然楊茂話只係來幫手宣傳吓本書，不過佢都幾關心嚟緊嘅立法會選舉，仲主動提起，話知道新思維狄智遠要出選。佢又話，自己同阿狄因為社福嘅事而有接觸，都幾相熟，讚對方喺《百川匯》裏面嘅相片幾靚仔上鏡；楊茂又話同新思維嘅黃成智見過一兩次面，但同佢唔係好熟。Emily問楊茂點睇新思維，部長就淨係答咗一句：「好細。」呢個答案真係耐人尋味。