新聞類別
副刊
詳情#
【明報專訊】泛民建制議員喺立法會劍拔弩張，不過今屆會期接近尾聲，一眾議員噚日都放低矛盾，出席4年一次嘅立法會同樂日，議員記者打成一片，輕鬆一下。唔少即將離任嘅資深議員大展歌喉，都有啲憑歌寄意味道，民建聯葉國謙同公民黨黨魁梁家傑就對唱《難為正邪定分界》，阿謙一句「努力興建」，傑哥一句「盡情破壞」，最後兩人「深情對望」，輕嘆「彼此也在捱」，就好似係近年泛民建制對峙嘅寫照，引嚟全場一片笑聲。
唔少人覺得社會愈嚟愈撕裂，主席曾鈺成噚日或者有感而發，同黨友蔣麗芸高歌《獅子山下》，雖然蔣麗芸反高潮話「欷歔多於歡笑」，但主席或者始終希望「拋棄區分求共對」。同樂日歌唱冠軍，最終屬於有意競逐連任嘅經民聯盧偉國，佢用「秋官腔」唱出鄭少秋嘅《輪流轉》，至於議席「有沒有改變」，9月自有分曉。
除咗唱歌，其實同樂日仲有遊戲環節，由梁家傑等組成嘅議員隊，同記者隊鬥剝花生，最終議員隊險勝，梁家傑就話今屆立法會最大嘅「花生」就係政改表決甩轆事件。喺「有口難言」遊戲，就要睇議員嘅動作估詞語，民建聯黃定光七情上面，成功令3個要估迷底嘅泛民議員輕鬆勝出，建制泛民雙贏。
同樂日有近百個記者同議員參加，每人都有份票投「最具中氣」同「最具人氣」議員獎，最終工聯會王國興同曾主席眾望所歸，分別獲得殊榮。臨別在即，一眾記者噚日都排隊同即將離任嘅議員合照，留個紀念；4年轉眼就過，唔知新一屆立法會，又會係咩情况呢？
留言 (0)
