李慧琼深入「敵陣」 卿姐提回鄉證

【明報專訊】民建聯主席李慧琼（Starry）噚日深入「敵陣」——民主黨總部，接受民主黨主席劉慧卿訪問，話希望大家放下對立，走出困局。卿姐就話佢無回鄉證，指Starry作為建制派領軍人物，可以返內地見到京官，問Starry有無向京官反映香港人嘅憂慮、對銅鑼灣書店事件嘅睇法。Starry就話有，話有向中央提過向泛民發回鄉證，仲講笑話如果他日卿姐攞到回鄉證，佢都可能有功勞喎。


李：有向京提議發還回鄉證

港澳辦主任王光亞形容泛民議員屬建制一部分，咁Starry拜訪民主黨總部都唔會再係奇怪事。不過，Starry同卿姐都有舌劍唇槍，卿姐話家建制同泛民關係極差，雙方連飲杯茶嘅機會都無，仲話建制派好霸道，喺立法會霸晒重要委員會嘅正副主席位，卿姐話佢唔會再選，寄望Starry下屆喺立法會勸建制派唔好再咁做。Starry就話，泛民拉布，有時法案喺立法會傾好，但又因為遇到市民而反口，話泛民都有責任。


半小時訪問結束，氣氛都算友好，而Starry事後話，「今日我走進民主黨總部，希望卿姐有日可以來我們總部再繼續找出路」。