工聯會調查：領展10街市 無一個可「買齊餸」

【明報專訊】「民以食為天」，一日三餐對老百姓嚟講好重要，不過想煮一餐菜心炒牛肉、梅菜蒸鯇魚，以及番茄薯仔瘦肉湯嘅「兩餸一湯」究竟有幾難？工聯會上個月尾就以上述7項食材作標準，去領展10個街市調查，發現竟然無一間街市可以「買齊餸」。負責調查嘅王國興話，原因係領展街市所有街市都無鮮牛出售，而3個街市就無鯇魚賣。


因無鮮牛出售

調查都有統計街市內攤檔嘅數量及種類，了解領展空場問題。結果顯示，10個街市平均檔數為8.1檔，葵芳街市最慘，得兩檔攤檔，其次係麗閣同耀東街市，只有4檔。想要「有得揀」嘅市民就要行遠啲去附近街市。


最近領展成為眾矢之的，王國興噚日都炮轟領展加租、引入大集團，趕走小商戶同街市檔販，任由街市荒廢，令居民選擇大減。佢要求政府重新研究街市政策，喺規劃新市鎮時必須納入食環署市政街市，並盡量於受領展街市影響嘅地區覓地興建市政街市，引入小商販。