七一街站吸水又補水 「飛天豬」派冰水撐倒梁

【明報專訊】今年七一遊行沿途嘅街站數目破晒紀錄，除咗政黨蜂擁落力賣紀念品籌款，唔少新興團體都絞盡腦汁，吸引市民注意，總之花樣百出。例如關注綜援低收入聯盟賣「民主茶」，即係自家製涼茶籌款。工黨派印有「制度要變、狼英要走」嘅扇，叫大家「撥走梁振英」。


工黨派扇 「撥走梁振英」

公民黨今年主打印有「叫我香港人」嘅灰色恤衫，89蚊經濟實惠，再加埋主席余若薇嘅親筆簽名，都吸引唔少市民買番件。公民黨噚晚埋單計數，比去年多咗6000元進帳，一共有44.1萬。前自由黨成員、將軍澳區議員方國珊都擺街站，但佢唔係籌錢，而係收集反對興建台山核電廠簽名。


公民黨今年籌多咗6000蚊

噚日天氣熱，港區前人大代表「飛天豬」朱幼麟好貼心準備大量冰水，派畀遊行人士。今次民陣遊行喺「決戰689」，支持「倒梁」嘅飛天豬話，今次出嚟係想香港有個新開始，認為特首梁振英講大話，已經係香港人嘅恥辱，要求梁立即下台。都成70歲嘅飛天豬仲企喺梯上面嗌咪，搞到自己大汗淋漓，都咪話唔辛苦。


民陣今年全面「環保化」，除咗唔派場刊，仲呼籲市民自備水樽。環保團體「毋忘垃圾」喺遊行路線沿途擺4個街站，為市民免費「補水」。成員黃小姐話，六四晚會後開始聯絡大會講解構思，大會即刻同意，佢哋召集約30個義工做「送水員」，喺附近球場免費飲水機攞水，免費為市民供應飲用水，又同埋一批中學生擺回收膠樽街站。就讀中五嘅譚同學話，舊年都有參加回收膠樽行動，結果收到5000個膠樽，希望今年市民會響應大會呼籲，收到少啲膠樽。