「鋁板警察」再出更 大嶼行孖咇

【明報專訊】2012年「鋁板警察」喺新界北監察交通兩個月後，今日開始，又會見到佢哋企喺北大嶼山公路同機場路出更，會喺兩條公路做緊工程嘅地盤外「站崗」，提醒司機留意改道。


新設計親切啲 免嚇親司機

今次「鋁板警察」有兩對，有男有女，高1.7至1.8米，造價2.4萬元，新界南交通部執行及管制組總督察何淦貽話，近年新界南嘅嚴重交通意外多咗。睇番資料，好多司機唔係有心不小心駕駛，而係事發嘅高速公路路段上有工程地盤，「每日都改道」，所以想試吓喺呢兩條做緊工程嘅高速公路試驗半年，孖咇出動，一前一後提醒司機。


何淦貽又話，知道上次有唔少司機反映話見到警察公仔「嚇親」，特別係其中一個揸住雷射槍，「好得人驚」，所以今次搵嚟有平易近人感覺嘅同事作設計藍本，以1:1比例仿製，姿勢上似平日巡邏咁，一個手拎文件，另一個叉腰，「我哋目的唔係嚇人，只係想提高大家嘅警覺」。