善長贊助龍躉大蝦 賀明哥飯店開張

【明報專訊】由深水埗「明哥」（圓圖）陳灼明經營嘅北河燒臘飯店嘅「副店」，年初因被業主加租差啲結業，好彩得到對面手袋舖業主廉價租出舖位。事隔3個月，新店「北河同行（深水埗）」將以社企營式運作，於星期日（3日）正式開張。為慶祝新店開張，有善長贊助幾十斤龍躉同大蝦，由明哥煮成飯盒畀露宿者。明哥希望開幕儀式從簡，叫市民唔使送花牌，只望有心人到現場講一句「恭喜」。


明哥仲準備咗600份由善長捐出嘅曲奇餅，送畀到場嘉賓及市民，明哥仲話「市民一句恭喜已是最大支持」。佢邀請咗各界人士共襄盛舉，包括勞福局長張建宗，張建宗嘅新聞秘書回覆本報查詢話，局長嗰日有要事在身，唔會出席明哥嘅開幕禮。