新同盟關永業：支持度高過民協

泛民組織民主動力早前委託香港大學民意研究計劃，就立法會選舉做民調，了解市民對直選同超級區議會候選人嘅支持度，首階段結果喺提名期前公布。有意出選超區嘅新民主同盟大埔區議員關永業（圖）話，即使首階段民調結果唔理想，都唔會放棄。佢仲話，如果根據「雷動聲吶」網上民調，佢嘅支持度比民協仲高。


關永業有意同黨內兩名年輕區議員黎銘澤同許銳宇合組名單，指3人平均年齡只係約30歲，「算係有活力朝氣嘅團隊」。關永業承認新同盟先天不足，唔似其他泛民政黨喺香港各區都有樁腳，所以已着手喺九龍同港島搵地區團體幫手，協助宣傳。佢又話計劃搵啲前重量級人物站台，指前立法會議員鄭家富已經同佢影咗相做易拉架，希望短期內可以提升自己知名度。