舊街市變新聞博覽館 後年開幕

【明報專訊】立法會4月通過撥款8530萬元，活化上環必列啫士街街市為香港新聞博覽館。博覽館噚日同德材建築工程有限公司簽訂合約，活化工程預計2017年底完成，而博覽館就會喺2018年第一季開放。


保留內部結構 增設升降機

必列啫士街街市建於1953年，屬三級歷史建築。博覽館將保留街市內嘅樓梯及攤檔結構等，同時加設一部升降機，連接博覽館地下及1樓，同埋城皇街。承建商參與過PMQ元創方嘅活化工程，公司董事及總經理薛汝衡話，必列啫士街街市附近道路比較斜同狹窄，增加運送建材嘅困難。活化工程總建築顧問、建築師學會前會長林雲峰話雖然活化工程會加設升降機，但已委託結構工程師詳細勘測，確保安全。


博覽館副主席、資深新聞人陳淑薇（May姐）話，有信心工程唔會超支同延期。May姐透露正與各傳媒機構傾緊，借出一啲寶貴嘅新聞片同相片畀博覽館展示。佢又話唔會理會新聞事件係咪「敏感」，只要反映到傳媒工作及歷史就會展出。