火場外打卡 民建聯話好正常 被指抽水：向市民匯報

【明報專訊】九龍灣工廈迷你倉四級火，高級消防隊長張耀升殉職，市民都覺得好揪心，有政黨人士仲去咗現場，但似乎就唔係個個都受呢套喇。話說民建聯觀塘區4個區議員張姚彬、柯創盛、張琪騰、歐陽均諾去現場嘅相上載咗facebook，更有人影到幾個人喺消防車隔籬合照，被網民炮轟佢哋阻住救援工作，更認為佢哋乘機抽水好過分。


張琪騰噚日就喺fb留言回應話，「區議員到場了解情况，影相向市民匯報好正常，一班無恥的人到凌晨十二點多才離開」。民建聯九龍東立法會議員陳鑑林話，自己都有到現場，認為當區議員到場關心係應該嘅，影張相無咩出奇，形容議員助理見到「老細」落區視察，影相用喺工作報告唔係大問題。不過Emily聽聞，民建聯內部對今次幾個區議員抽水行為都好有意見，已經立即提醒大家要小心。


工黨主席胡穗珊前日亦喺fb上載短片同相，關心現場情况，同樣被網民批評抽水，叫佢唔好阻住消防救人，仲被人重提工黨喺審議財政預算案時，提出要削減消防處開支嘅修訂。胡穗珊回應強調過程中無阻住人救火，又話即使參選，「做一個正常人有可能做的事，何『抽水』之有？」


同被指抽水 東瀛遊刪post道歉

除咗政黨，旅行社東瀛遊同樣被網民鬧爆抽水，皆因東瀛遊喺fb發帖，推出多項紀律部隊同其他行業嘅優惠，留言話「我地真係要好好珍惜眼前人，有時間就陪下佢地，同佢地去個旅行吧！」，結果被鬧爆「抽死人水」，最終東瀛遊刪post兼出聲明道歉，至夜晚執行董事禤國全仲拍片解釋，並鞠躬道歉。