許曉暉勸學生哥 唔好忽略內地好處

【明報專訊】中港矛盾再度熱議，噚日副民政事務局長許曉暉出席一個香港學生到內地交流嘅啟動禮，佢語重心長同學生哥講，要了解國情同配合內地嘅機會，先可以有效發展個人事業。「大家要放開懷抱，唔好成日諗一個地方嘅壞處，而忽略佢嘅好處，要正反兩面都學習吸收！」


呢個計劃由香港青年工業家協會聯同職訓局（VTC）一齊舉辦，叫做「飛越港蘇」，計劃為期28日，其間22個VTC學生會去寧波、南京、蘇州、上海考察交流，了解內地工業運作模式同就業前景，為日後香港工業發展出一分力。香港青年工業家協會會長張華強話，交流計劃可以豐富學生生活，亦可以方便中港企業交流，一齊發展中港兩地嘅工業。