蘇敬恒獻「第一次」 趕爆粗漢離場

【明報專訊】港台節目《城市論壇》向來吸引各方政見嘅維園阿叔阿伯出席，不時出現台下火花大過台上嘅場面，主持人要維持秩序都幾考功夫。噚日節目討論銅鑼灣書店事件，台下一眾阿叔阿伯嘅行為就搞到主持蘇敬恒幾勞氣，蘇敬恒仲獻出佢主持呢個節目大半年嚟嘅第一次：將一個唔守秩序嘅觀眾趕離場。


部分台下觀眾喺節目期間不斷質疑蘇敬恒主持得偏頗，蘇都無制止；但去到有中學生台下發言，表示欣賞銅鑼灣書店店長林榮基有勇氣講出真相、提醒香港人發聲，又擔心日後講錯嘢會被內地捉走、人間蒸發，呢番言論就刺激到坐喺另一端嘅一個男人，個男人大鬧學生，仲講晒粗口。由於節目直播，蘇敬恒聽到粗口，就直接要求工作人員將該男人帶走，嗰個男人情緒激動，除咗不斷講粗口大罵主持同工作人員，更推撞帶走佢嘅工作人員。