Slide the City 8月瀡到中環 最貴收580

【明報專訊】舊年喺啟德郵輪碼頭舉行嘅「Slide the City」，今年8月24日開始，一連6日會「瀡」到中環海濱活動空間，到時會有10米高台承托起滑水梯，旁邊有新增嘅迷你人造沙灘。今年門票用4個時段劃分，最貴係周五、周六、周日晚上6點半至11點門票，每張580蚊。


「Slide the City」舊年因為首日喺無通知下提早「截龍」，令部分參加「無限次體驗」人士只玩到幾次。今年門票改用時段劃分，由早上9點至夜晚11點分4個時段，會設人數上限，希望參加者可以玩多幾次，最後一日（8月29日）只會開放到下午1點。


票價視乎日期、時間而定，晚間票貴過日間票，其中8月24、25、29日正價180蚊至480蚊。8月26至28日正價280蚊至580蚊。如果市民喺6月23至29日訂飛，會有九折優惠。