自拍一日工作 陳恒鑌讚自己皮膚嫩

【明報專訊】建制派最近喺網絡戰上突飛猛進，繼民建聯鍾樹根玩轉facebook之後，黨友陳恒鑌（Ben）都唔執輸，噚日喺facebook上載短片，出動GoPro追蹤自己做議員嘅一日，都呃到唔少like同瀏覽量。阿Ben呻住話朋友質疑點解有啲議員咁得閒，但佢同朋友聚下都咁難，於是「有片有真相」，全程影住自己議會工作以證清白。


短片由佢6點半喺屋企起身開始，7點擺街站，9點落區滅蠓，10點趕返立法會，直到夜晚12點先返到元朗，踩足17個鐘。佢喺片中不忘批評，泛民提咗2000幾條修正案又唔開會，覺得「撐起議會都係靠建制」。不過阿Ben都話，拍片初初感覺好似畀人偷窺咁，唔慣對住個鏡頭咁近，但好彩自己天生皮膚比較幼嫩。