怕上庭傾唔到特權法 毓民狂點人數拖時間

【明報專訊】自從政府收回版權修訂條例草案後，立法會點人數鐘聲終於平靜咗一排，但立法會噚日點人數鐘聲又頻密響起，最險一次差15秒就唔夠人，差啲流會。而大部分點人數都係由議員黃毓民提出，唔通佢想拉倒審議中嘅《截取通訊及監察修訂條例草案》？


連立法會主席曾鈺成趁休息時段，都專登走去問毓民因乜狂點人數。毓民解釋，原來草案之後，就輪到佢自己提出用特權法成立專責委員會查梁振英機場事件同旺角衝突。事關佢今日要上庭，驚趕唔切返立法會提動議，所以諗咗招「點人數」拖延時間，希望會議延長，等埋佢上庭後返嚟先傾特權法議案。


不過，有建制派批評毓民做法好自私，浪費議會審議時間。但毓民就回應話「無所謂」，更指自己提出嘅兩個特權法動議都係為咗公眾利益，係負責任議員表現。雖然相信毓民最終可以如願以償，不過噚日就苦了一班政府「狗仔隊」，要望實議員出席以防流會。