美總領事夏千福離任 繼任人識普通話日文

【明報專訊】美國駐港澳總領事夏千福不時落區搵美食、睇吓傳統中國文化咁，令唔少網民都好like佢，不過佢好快就會調走喇，由唐偉康（Kurt Tong，圖）接替，今年8月起履新。


唐偉康做過駐華使館參贊

總領事館嘅新聞稿話，唐偉康1990年起加入美國國務院做外交官，2006至08年擔任國家安全委員會亞洲事務主任，之前亦做過駐華大使館環境、科技和衛生事務參贊；美國財政部駐東京副代表等，而目前唐偉康就喺國務院經濟及商業事務局擔任首席副助理國務卿，係國務院處理經濟事務最高級職業外交官。


夏千福可以話係「中國通」，唐偉康就識講普通話同日文，曾經喺北京教育學院、台北中國語文聯合研習所、東京日本語文聯合研習中心及東京國際基督教大學讀過書。