訪法談兩地關注議題 CY晤法總理 出稿不提Lancome

【明報專訊】法國化妝品牌Lancome近期取消同歌手何韻詩合辦演唱會，事件引起香港市民以至國際傳媒關注。身為特區首長嘅梁振英（CY），噚日喺官式訪問法國行程最後一日，同法國總理瓦爾斯會面，政府新聞網噚日發文，話「就雙方關注的議題交換意見」，其後嘅新聞稿話兩個人有傾到創新科技、運輸、貿易、專業服務、教育同文化等合作，但未見有Lancome等字句。Lancome事件關乎港人感受同法國企業利益，唔知算唔算係兩地都關注嘅議題呢？


政府新聞網又提到，CY噚日同創新及科技局長楊偉雄去巴黎一個科研發展區，參觀巴黎中央理工學院—電力高等學院，聽學院嘅簡報。新聞網形容呢間學院係當地區內重要嘅工程訓練同研究中心，同香港嘅大學有學術同科研合作，CY期望兩地院校未來有更多協作機會。CY隨後出席居法港人舉辦嘅酒會，了解佢哋生活同工作情况。


返港一天再離港 放假10日

CY噚日結束訪法行程後，今日會返到香港，不過CY來去匆匆，聽日又會啟程離港，皆因佢聽日開始離港放長假，一直放到20號。據政府新聞網，CY今年未正式請過年假，只係借公眾假期離開，今次放近10日嘅長假，或者可以趁機充電。


政務司長林鄭月娥會喺6月12至14號署任特首，財政司長曾俊華就會喺6月11號，以及由6月15號至CY回港之前，署任特首。