張國鈞立選前減磅 重提北極企鵝軟銷

【明報專訊】有意參選立法會嘅各路人物，近期已經摩拳擦掌開始做準備，好大機會出戰港島嘅民建聯副主席張國鈞（Horace），噚日同傳媒茶敘時就透露未來3個月嘅工作：減磅。選戰除咗政綱，外形包裝都係重要一環，雖然Horace未正式宣布參選，但就透露近期請咗健身教練，一星期3堂密集式訓練，又會配合健康餐單，目標係3個月內減十幾磅，佢並應記者要求擺甫士，展示一下身材。


近期自嘲成為咗網上潮流，曾經喺電視節目形容北極「人少企鵝多」嘅Horace，最新嘅宣傳車就擺咗隻企鵝喺自己肖像隔籬。企鵝其實主要喺南極生活，Horace笑言，每次喺網上搜尋自己個名，都會出現企鵝嘅關連詞，既然公眾都咁記得企鵝，企鵝本身又可愛，所以都希望藉此展現輕鬆形象。


跟樹根保持聯絡 「關係OK」

Horace黨友鍾樹根（樹根）早前講明唔會排喺名單第二出選港島，又揚言考慮退黨；Horace噚日話一直有同樹根聯絡，形容兩人「關係OK」，佢希望搵到方式，令樹根留喺民建聯幫手，至於成功機會，Horace就話相信唔係無可能。Horace噚日沿用民建聯口徑，無明確表態支唔支持特首梁振英連任，但就批評唔少打算參選港島區嘅人，除咗唔要梁振英連任之外就無其他政綱，搞到其他社會民生議題失焦。