林卓廷爆老婆瞓過廣華單人房「幾個鐘」

【明報專訊】家住元朗嘅民建聯立法會議員陳恒鑌，太太獲安排入住廣華醫院單人病房分娩，事件引起爭議；民主黨區議員林卓廷就乘機抽水，話自己囡囡「叉燒妹」10年前都係由新西跨區去廣華出世，仲話「內子確實瞓過廣華醫院單人房……幾個鐘」。不過，阿廷就話佢太太點會咁好彩住到單人病房，講笑話10年前係一介平民，「醫院識我係老鼠」，當年係因為生BB嘅人唔多，佢哋先獲安排喺單人產房接生，佢更可以入去產房陪產。阿廷話如果當時孕婦多嘅話，佢就唔能夠享受呢種待遇。


阿廷喺facebook留言，「無論如何，我同尊貴議員一樣，要感謝醫護人員細心照料，讓叉燒母女平安，雖然佢哋無得住單人房」。


本身係醫生嘅公民黨郭家麒繼續關注事件，噚日去信醫管局要求跟進及澄清近期發生嘅「特殊服務」事件，並制訂指引確保市民能公平享用醫療服務，避免前線醫護人員受壓。