詹培忠想選港島區 稱有人勸退

【明報專訊】立法會前金融服務界議員、「潮州怒漢」詹培忠，後日（6號）就會開記者會，公布可能會參選立法會港島區直選。詹培忠近排接受電台專訪，表明參選係希望畀市民多個選擇，仲承認曾經有人想勸退佢，「但唔係惡意」。至於係咪「西環（中聯辦）」勸退，詹培忠話「未必係，可能係朋友。唔好將責任推畀中、西環」，強調自己「無有怕」。


詹培忠自1990年代開始曾做過幾屆金融服務界議員，本來佢都有報名角逐連任2012年嘅金融服務界議席，但後來突然退選。DBC《最好的時光》聽日會播出詹培忠專訪，詹喺節目中話打算參加直選，仲話自己係「新丁」。


批評政府表現 唔怕黑材料

佢喺節目裏面批評現屆政府唔符合市民要求，例如特首梁振英UGL問題無再跟進，又話中央最關心香港社會近年唔和諧，「梁振英嘅表現，中央都好擔心」。不過，節目中無講到梁振英連任問題，所以大家如果想知道詹培忠會唔會撐梁振英連任，可能就要等星期一嘅記者會。


詹培忠亦喺節目到講特首選舉，呼籲有意參選特首嘅人要企出來，「怕乜嘢」，仲分享選舉心得，話通常男人喺選舉時嘅黑材料不外乎銀紙同女人，認為只要黑材料唔係對國家安全有威脅，啲有意參選者都可以平常心對待。