星戰小影迷 兩歲起捧場

【明報專訊】《星球大戰》係唔少影迷心目中嘅經典，香港迪士尼樂園由今個月11日起，設立新園區「星球大戰：入侵明日世界」，其中遊樂設施「飛越太空山」會被改為星戰同銀河系場景。噚日迪士尼仲邀請咗60個星戰迷參加預告活動，Emily發現現場有唔少小影迷。


6歲半嘅Gabriel由媽媽何太陪同下到場，佢同Emily講兩歲已經開始跟屋企人睇《星球大戰》，嗰陣已經識講啲角色名，最期待可以見到黑武士。何太就話Gabriel熟讀電影，試過參加一個《星球大戰》嘅問題遊戲，20條問題只係答錯咗1題，講笑話平時默書都無咁叻。


《樹大招風》導演因星戰讀電影

雖然噚日無得試玩，但影迷都好興奮，拎住光劍影相留念。有份執導本地電影《樹大招風》嘅導演黃偉傑，就帶埋著住《星球大戰》圖案衫嘅小朋友參加，佢話18歲就開始睇《星球大戰》，過去廿幾年每日都聽《星球大戰》嘅配樂，仲因為受電影嘅美術設計啟發，先選擇咗去英國修讀電影。