新同盟製「特事特辦」行李牌籌款

【明報專訊】六四晚會、七一遊行都係泛民政黨籌款時機，今年係選舉年，相信各泛民政團會出盡法寶吸金。新民主同盟范國威噚日就向傳媒介紹該黨嘅紀念品，今次抽盡特首梁振英早前捲入嘅「行李門」風波，包括製作「特事特辦」行李牌，等大家齊齊帶住「特權」去旅行。


范國威話，今次推出嘅物品包括寫有「我係香港人」嘅運動納米毛巾，希望表達要守護本土利益。至於特事特辦系列方面，就包括有行李牌、A4文件夾同埋便條紙，全部寫有「特事特辦」之餘，亦有龍蝦公仔喺上面，諷刺特首夫人「鉗」制職員、行使特權，要求機場職員為佢個女嘅行李特事特辦；佢仲建議市民去旅行時，都將特事特辦行李牌掛喺行李度，睇吓會唔會有特殊待遇咁話。


新民主同盟借六四籌款，會喺六四集會外，或者七一遊行擺街站，亦會推出網上預訂服務，可以喺新同盟facebook專頁優先訂購。價錢方面，市民如果捐出80蚊，就會有毛巾，捐60蚊就有行李牌，40蚊就有文件夾，20蚊就會有便條紙。